नवरात्रोत्सवाचा जल्लोष, देवी विसर्जनासाठी वर्धेत वाहतूक पोलिसांचा चोख बंदोबस्त

नवरात्रोत्सवाचा जल्लोष, देवी विसर्जनासाठी वर्धेत वाहतूक पोलिसांचा चोख बंदोबस्त

वर्धा (प्रतिनिधी)
शहरात नवरात्रोत्सवाचा उत्साह शिगेला पोहोचला असून देवीभक्तांच्या गर्दीने वर्धा दुमदुमली आहे. प्रत्येक चौकाचौकात उभारलेले देवी मंडप, लंगर व महाप्रसादाचे आयोजन यामुळे वातावरण मंगलमय झाले आहे. शेजारील गावांतील नागरिकदेखील दर्शनासाठी वर्धेला धावत येत असल्याने शहरात मोठी गर्दी होत आहे. या पार्श्वभूमीवर पोलिस अधीक्षक अनुराग जैन यांच्या मार्गदर्शनाखाली वाहतूक पोलिसांनी काटेकोर नियोजन करून शहरात चोख बंदोबस्त उभारला आहे.संध्याकाळी ४ ते रात्री १२ या वेळेत शहरात अवजड वाहनांना प्रवेशबंदी करण्यात आली आहे. त्यासाठी जुनापानी नाका, धूनीवाले बाबा मठ, उडानपुल व आरती चौक येथे अधिकारी-अमलदारांना पॉइंट ड्युटीवर तैनात करण्यात आले आहे.१ ऑक्टोबर रोजी देवी विसर्जन मिरवणूक होणार असून त्या दिवशी दुपारी ४ ते रात्री १२ या वेळेत मिरवणूक मार्गावर लहान व अवजड वाहनांची पूर्णतः प्रवेशबंदी राहणार आहे. बजाज चौक ते छत्रपती शिवाजी महाराज चौक या मुख्य मार्गावर बॅरिकेड्स उभारण्यात येतील.पर्यायी मार्ग म्हणून बजाज चौक पोस्ट ऑफिस जेल रोड  आदित्य मेडिकल असा मार्ग सुरू ठेवण्यात आला आहे.बजाज चौक, निर्मल बेकरी चौक , सोशलिस्ट चौक – छत्रपती शिवाजी महाराज चौक ,आरती चौक मार्गे पवनार विसर्जन स्थळ हा विसर्जन मिरवणुकीचा प्रमुख मार्ग असेल. या ठिकाणी मोठ्या प्रमाणात गर्दी, लंगर व महाप्रसादाचे आयोजन असणार असल्याने नागरिकांनी पर्यायी मार्गांचा वापर करण्याचे आवाहन करण्यात आले आहे.बजाज चौक – एस.टी. बसस्टॅन्ड – पोस्ट ऑफिस चौक – आरती चौक बाहेरील रस्त्यांचा वापर करण्यास प्राधान्य द्यावे

विसर्जन मार्गावर अवजड व चारचाकी वाहने आणू नयेत लहान मुले व ज्येष्ठ नागरिकांची विशेष काळजी घ्यावी गर्दीत दागदागिने, पर्स, मोबाईल वापरणे टाळावे अडचण आल्यास तात्काळ टोल फ्री क्रमांक ११२ वर संपर्क साधावा

वाहतूक शाखेचे निरीक्षक विलास पाटील यांनी नागरिकांनी पोलिसांना सहकार्य करून उत्सव शांततेत व सुरळीत पार पाडावा, असे आवाहन केले आहे.